و رحل "الحكيم" في صمت

رحل عن عالمنا منذ يومين احد ابرز القادة الوطنيين فلسطينيا ، عربيا و عالميا..انه "الحكيم " جورج حبش..و لست هنا لاتحدث عن مسيرته النضالية منذ اشتراكه في تاسيس حركة القوميين العرب..الى التزامه بقيادة الجبهة الشعبية لتحرير فلسطين..و ما تخلل ذلك من نقاط مضيئة و مشرفة تراوحت بين وطنية المواقف السياسية و تجذرها و تعارضها مع مشاريع التسوية و الاستسلام .. الى العمليات الفدائية التي ارعبت و اربكت الكيان الصهيوني لعقود .. بل لاستنكر- دون ان استغرب - الاهمال الاعلامي الرسمي لهذا الحدث و لهذه الشخصية التي تجاوزت كونها فردا لتتحول الى رمز و الى خط طبع بحجمه و ثقله ملامح الصراع العربي / الصهيوني لمدة ليست بالقصيرة ..
فهل من خير في امة لا تودع ابطالها بالاحضان

عشب . شعب . بشع

اليوم نحبو نعملو درس في اللغة العربية .. و بالطبيعة ، بعيد كل البعد على القومية العربية و الامة العربية و جامعة الدول العربية

الحكاية و ما فيها .. انو ثمّة جذر مقلقني شويّ..الا وهو : ش.ع . ب

و الجذر هاذا هو اللي عاملّي في راسي ضجّة..و حس كبيـــرو هو ما يكسب كان ثلاثة كليمات يدور بيهم في الدولاب ..و اللي هوما : شعبٌ ...و..عشب .. و .. بشع

خلينا نبدة بالاخـّــرانيـّـة..بشع

اكيد سمعتو على بشاعة الوضع في العراق..و قداش الاجتياح الصهيوني لغزة كان بشع .. و البيئة ماشي وضعها و يولي ابشع و ابشع ..و شفتو ربي كيفاش بشّع الخلايق متاع حكامنا..و وزراءهم..و رغم ذلك وجوههم ديما في وجوهنا..

اما اللي يزيدني قلق على قلق..هو بشاعة الاصوات اللي نسمع فيها في التلفزة ..و في الشارع ..و في القهوة..و في البار..و وصل بيا الامر انو هالاصوات ولت تجيني في المنام على اشكال مختلفة..هذا بوق يجري ورايا .. وهاذي قرجومة تخب تتلهوث عليّ..و هذا سيقل متاع قناة يحب يدمغني..والله حالتي حليلة..وليت نتلبد باش نسمع غنيوة باهية..و وليت نترعش كيف نسمع صويّت جميل..رعشة تشبه لرعشةالبنية كي تتباس لاول مرة

و توا يزينامن البشاعة ..و خلينا نتجاوزو هالحديث البشع..و هالاوضاع البشعة..و نمشو لهاك الكليمة العزيزة..و الغالية..اينعم .. عزيزة و غالية..تي راهي كلمة عندها ايحاءات وطنية..ياخي ما سمعتوش على تونس الخضرا..؟..هيه..ماو هاذاكا هو العشب ..كلمة هكه تشرح القلب..و عندها ابعاد استراتيجية كبيرة..منها العناية الموصولة بالملاعب المعشبة..و القرارات الرايدة في الاعـتـناء بالمساحات الخضراء..اما بالنسبة لكوادرنا متاع الصحة..فانهم يلوجولنا على مصلحتنا..و يحطولنا على ذمتنا في بوكي متاع اعشاب طبيةناجعة و فاعلة و ما عندهاش مضاعفات.. و هكه نحلو ازمة غلاء اسعار الدوايات..و عدم توفرها في الاسواق..و ثم .. تبلاش منها هالعقاقر متاع القـورّه...حتى من البركه ما فيهاش..و مادامي البلاد خضرا خضرا..و العشب موجود في الملاعب .. و المعدْ .. و الهناشر..اكيد راو هاك البقر متفلّت على الدنيا .. و نهار و طولو و هو يمضغ..و ترصّي بيه عند طبيب الهوايش..امّاله هذاكه هلاش اللحومات اسعارها غالية..و موش كيما الاسباب الواهية اللي يحبو يكرسوها بعض الحاقدين...و ثم انا نقولها صراحة..يا العشب يا اللحم ... آ .. مّــاله ...الشعب لازمو يكون قد اللحظة اللي هو فيها ..و يحسم في قراراتو لانو اصبح اليوم واعي..و جدير بتحمل مسؤولياتو

الشعب ... اللي في الحقيقة جميع الجهود مكرّسة من اجلو..و من ادل رفاهيتو..و يجو يعطوه حريتو..؟ و تعدديتو ..؟ و يرجعولو فلوسو ..؟

لكن الشعب ماهواااااش فاهم ..راهو كل شي و وقتو..و كل ساعة و علمها..و الناس اللي واقفين علينا - ربي يعينهم -الله اعلم اش قاعدين يحضرولنا في الخفاء..و دايـّــور..هوما باستمرار يشجعو على الاستثمارالخارجي في البلاد..و هوما زادا - الحق - ماهمش مقصرين...و مشرفينّا باستثماراتهم ! و مشاريعهم ! في الخارج..و عاطين صورة رايعة على ذوقنا و فيانتنا ..و الشعب مصر على تطييح قدرو بالملاقفة الزايدة و الفراع الماسط..و هاذاكا علاش من قلة احترامو لروحو..كنت نسمع قبل : ثورة شعب .. باسم الشعب .. تحالف قوى الشعب .. و تو هاني و ليت نسمع كان : قهوة شعبية .. حي شعبي .. اسعار شعبية ..ياخي ما اتّعضش الشعب من "العربي" اللي قدرو طاح..و ولى كل شي خايب يتسمّى باسمو كيما : حومة عربي .. سراول عربي ....... ؟؟؟

ثمّه كلمة وحدة من الجذر تناسيتها و لكن لازمني في الاخّر نقولها .. باش ما نبانش بهيم في اللغة العربية..اما هي ما تعني حتى شي في هالوضع..

ياخي بالله اش قولكم في كلمة : شـبـع

؟؟؟؟